هاهو زهر جديد , ونبتٌ وليد
يشق الثرى ليلقى الوجود
وقد تطلعت عيونُه نحو شمسٍ أطلت من بعيد
وقد ألقت بأشعتها لتحتضن الزروع ببستانٍ فريد .

لم تدرِ تلك الزهور الوليدة ما أَخفى لها البستان من شوقٍ وحنين
لم تدرِ - فور ولادتها - كم من لهفةٍ أُخفيت لها وتوقٍ دفين .

فكأنّ بطن الأرض وبراعم الزهر أمٌ تحتضن الجنين .

لا ، لم أُبالغ في التعبير ......

بل لعلّي لم تُسعفْني كلماتي القلائل لأصور مدى اشتياقنا للُقياكم ،
إنه شوق دونما لقاء سابق ،
لكن لطالما انتظرنا ميعاد اللقاء .

لذا ، فدعوا خلف ظهوركم كل ما تخفونه من مشاعر القلق والرهبة ،
وانفضوا عن رؤسكم أوهام الغربة ،
لم يعد لكل ذلك مكان في صدوركم بعد الآن ،

فمشاعر الدفء والانتماء ستطوى ما تبقى منها في غياهب النسيان .
لا تهدروا حتى اللحظات من سنوات البقاء دون أن يغمركم ذاك الدفء الجليل .

بقلم الطالبة : سلمى محمد فتحي

ومع بعض النصائح العامة التي يهديها لكم الطالب : محمد ناصر

   الموضوع ده انا عايز اقدم فيه شوية نصائح لاعدادى اعتقد انها حتفيدهم كتير اوى و اول حاجة احب اقولها للطلبة ان انتم اكيد داخلين فى اول السنة حتلاقوا نظام جديد لم تتعودوا عليه من قبل و ممكن لو مسافرين تلاقوا نفسكم حتذاكروا بطريقة تانية فى اماكن جديدة مع ناس متعرفهموش كويس.
حتبدأ تحس انك اول السنة - ده حصل معانا- انك ضايع فى كل المواد و تايه ومش فاهم حاجة ومش عارف اذاكر عندى كله انجليزى و الكتب فيها حاجات كتير وووو....... نصيحتى ليك انك اياك تفقد الثقة بنفسك و لا مرة و موضوع الثقة ده مهم جداً و بعدين انتم حظكم كويس لان مصادر الدراسة و الكتب و كده نازلة على المنتدى و الموقع فده احسن بكتير لو قارناه بحالنا العام الماضى. طيب ادى الكتب موجودة و الملخصات و ورق الكورسات من اول السنة فى حاجة تانية مهمة و هى ان انتم معندكوش امتحان نظرى ترم يعنى النظرى كله فى شهر 5 و بالتالى فى طلبة تهمل النظرى و متبصش فيه و ده غلط صحيح انت مش لازم تذاكر النظرى صم فى الترم الاول لان عندك اجازة نص السنة طويلة ممكن تلم فيها المنهج فبالتالى انا من رأيي ان الطالب يذاكر النظرى ككل فى الترم الاول و يقراه كله كويس و يفهمه و فى نص السنة يأكد عليه و يحفظه صم اما العملى فهو فيه امتحان ترم و لازم من البداية يتذاكر صم و كويس و باهتمام و خصوصاً ان حاجات كتير فيه ظريفة مش محتاجة مذاكرة اوى زى الكيمياء.اما النظرى من بداية الترم التانى فلازم من الاول نبتدى فيه مذاكرة جامد و باهتمام.اهم حاجة لازم تتغلبوا عليها هى فقد الثقة بالنفس و دى نقطة مهمة جدا يعنى انا فى اول السنة كنت معنديش ثقة فى نفسى خالص و لما افتكر ايام ثانوى ابقى حعيط بجد مش بهزار لما افتكر ان كنت فى ثانوى احسن طالب على زمايلى و مفيش سؤال معرفش احله و بعدين الاقى نفسى فى اول الجامعة مش عارف احل حاجة فضعفت و فقدت الثقة بنفسى و ده شىء سىء للغاية فمحدش يفقد الثقة بنفسه ابداً و افتكر كل متواجهك مادة صعبة فى الثانوى كنت بتعمل ايه و بتتغلب عليها ازاى و استمد الثقة بنفسك و خليك عارف ان انت جاى هنا بمجموع عالى و طول عمرك حتفضل كده.احتفظ بالامل مهما بلغ الوضع و مهما احسست بأن الدراسة صعبة. وتوكل على الله وكن على ثقة بأنك اذا اجتهدت فان الله لا يضيع اجر من احسن عملا و اتمنى لكم التوفيق جميعاً .